أعلى بصوتك واتغرّ
سمّع جدران الفقر
المتربع على رسم البركان
والجهل اللى بيهرب منك يلاقيك
جوّه شقوق التِعبان
يلعن كل ثوانى الساعة
والضحكة الهبلة الملتاعة
ويغطّ فى نووم
مهموم
متعلم من ظلم الدنيا
إنّه فى يوم
لازم هيكون إنسان
وانت السجّان

وانت اللى مكسّر ف جناحى
وانت المتسبب فى جراحى
رتب افكارك واحلامك
على جثة مخدوع بكلامك
والعنّا فى هزهزة المراجيح
وخنوع الريح
المتستف على قلب جريح
ما العالم خايب متخدر
بيسجل أشعار فى جنابك


وكأنك مش سبب النكبة
ولا رافع صهيون الراكبة
على كل ضهورنا بحرية
وكأنك مش سبب البحة
فى صوت موّال البدرية
وارسم على خد المساكين
دمعة حزن كلمة جبن

واصرخ او حتى ماتصرخش
وأومر أو حتى ماتأومرش
دا العالم مسكون بالخوف
وبجنى ب شرّك متلون
والكلمة المهزوزة حروف
والصرخة المكتومة بقسوة
فى ضلوع الكل


وشْوشْ دَكَرَك
عند الغجرية السمرا
والبنت البيضة الدلوعة
اللى مانافع فيها
كل صنوف التعقيم ولا التقويم
دا انت بذاتك ظلم الدنيا
وكل الضيم
وانت الغيم
اللى مايرمى الخلق بميه
اللى أذانا بصاعقة قوية
وانت جميع الشر الساكن فى البشرية


وانت البركان الطالع
من بطن العهر
بتوزع فيروسك ع العالم
زى الافعى بترش. بتبخ
واحنا ننخ
ولا ميت ترياق يكسر سمك
وانت بتحفر واحنا بنحفر
كلنا نازلين هد يابوش
وشيطانك فى الدنيا جيوش
أنات العالم ماتهمك
والدم اللى بيجرى بسِمك
وكأنك أبليس التانى
وكأنه اتمكن من دمك
قبر يلمك
قبر يلمك

مـ,ـنـ,ـقـ,ـولـ,

جميل يامان تسلم ايدك على الكلام الجميل
تقبل مرورى
فى رعايه الله

شكرا يامحمد على المرور الجميل ده
تقبل تحياتى

تسلم ايدك ياغالى
لا تحرمنا من جديدك دائما
فى رعايه الله

اشكرك اخى الغالى على التميز
والكلمات الجميله
تقبل مرورى
قصه غرام

مشكورين ياجماعه على التفاعل الجميل ده فى الموضوع
تقبلى تحياتى

شكرا ياجماعه على التفاعل الجميل ده فى الموضوع

شكرا على موضوعك الجميل

انتى اللى شكرا على مرورك الغالى ده
تسلم